నువ్వు మాత్రమే లేవు

‘చెప్పండి నా...’

రాత్రిపూట అక్షరం కాలేక నిన్ను తడిమితే

మెత్తటి గొంతు... 

ఆపైన రేపటి ఉదయం చిలుకకొయ్యకు తగిలించడానికి

నువ్వు నేసే వార్తల వంతు

*   *   *

యుద్ధంలానూ... శాంతిలానూ... 

ఏకకాలంలో ఎలా సాధ్యమో అసలు

చల్లటి చిరునవ్వు మాత్రమే చూశాము కానీ

లోలోపలే తెగి ముక్కలుముక్కలుగా రాలుతున్న చప్పుడు

నీ భార్యాబిడ్డలైనా వినగలిగారా?

*   *   *

ఇంతగా ఏకాంతాన్ని కౌగిలించుకున్నావని

లోలోపలే ఉండలుఉండలుగా చుట్టుకుని పోయావని

నీ చుట్టూ ఆవరించిన సమూహత పసిగట్టే ఛాన్సే ఇవ్వలేదు కదా

పువ్వు మెత్తగా విచ్చుకోవడం చూడలేదు నేను

కత్తిలా దిగబడ్డప్పుడు మాత్రం నువ్వై కనిపించావు

*   *   *

నిన్ను నీలోకి దాచేసుకుని

ఎవరెవరివో కన్నీళ్ళు భుజాన మోసుకుని

నడుస్తూ నడుస్తూ రోడ్డు మలుపులో మాయమైపోతావని

ఇక ఎదురుచూపులు లేనేలేవని తెలిసే వుంటే...

ఆయమ్మ కన్నీళ్ళు నిలబెట్టి వుండేవేమో

*   *   * 

అవును, నువ్వొక పరిచిత అపరిచితుడివి

అందరూ వున్న అనామకుడివి

సుపరిచిత దారుల్లో కదులుతున్నట్టే అనిపిస్తూ

విడిచిపెట్టిన వొయాశిస్సుకోసం వెదకులాడే ఎడారి పథికుడివి

*   *   *

ప్రతి సాయంత్రమూ అక్షరాలు వార్తలుగా మారుతూనే ఉన్నాయి

ఉదయాలన్నీ వార్తాపత్రికలను మోసుకొస్తూనే ఉన్నాయి

రాజకీయాలు.. . కుట్రలు... కుతంత్రాలు... 

యథాతథంగా బతుకుతూనే ఉన్నాయి

నువ్వు మాత్రమే లేవు...

*   *   *

మిత్రమా!

నిట్టనిలువునా కూలిపోయావు కదా

ఆ కత్తిపోట్లను నీ చిట్టచివరి ఊపిరి అడిగే వుంటుంది

‘నేనేం పాపం చేశాను?’

‘సాటి మనిషికి సాయపడడం నేరమా?’ అనికూడా

సమాధానమయ్యే శక్తి ద్వేషం కక్కిన రక్త ధారలకే కాదు

మాకు కూడా లేదు... క్షమించు!

------------------------------------------------

చిత్రం: చిట్టత్తూరు లాస్య

(ఏప్రిల్ 28, 2026 న హత్యకు గురైన ఆత్మీయ స్నేహితుడు, చిత్తూరు జిల్లా వి.కోట మండలం ఆంధ్రజ్యోతి దినపత్రిక జర్నలిస్టు వి.జగన్మోహన్ రెడ్డి స్మృతిలో- రచయిత)

# మే 15, "సారంగ" వెబ్ మేగజైన్లో ప్రచురితం #