కిరోసిన్ బుడ్డీ
❤️ కిరోసిన్ బుడ్డీ ❤️
చూపుల చేతులు చాచి
ఆప్యాయంగా కళ్ళు కౌగిలిస్తాయి
పురాతన రాగమేదో గుండె గట్ల వెంట
అలలు అలలుగా సాగుతుంది
కిరోసిన్ బుడ్డీ చిమ్నీ లోంచి వెలుగు
ఎర్రెర్రగా... పచ్చపచ్చగా... బలహీనంగా...
గదితోపాటు హృదయాన్నీ ఆక్రమిస్తుంది
తాను బూడిదై కాంతిని త్యాగం చేసిన అగ్గిపుల్లపై
కృతజ్ఞత వెల్లువవుతుంది
ముఖం మాడ్చుకున్న విద్యుత్ బల్బును చూసి
కసికసిగా నవ్వాలనిపిస్తుంది
కృత్విమత్వాన్ని ఖండఖండాలుగా నరికి
సహజత్వ మైదానంలో వెదజల్లినంత ఆనందం
వెన్నెల నీడలలో విరజిమ్మబడ్డ
ఆరుద్ర పురుగుల చమక్కులన్నింటినీ
వస్తూ వస్తూ దీపప్పురుగు మోసుకొస్తుంది
చూరుకింద అరుగుమీద వల్లెవేసిన
పెద్దబాలశిక్ష నీతి వాక్యాలను
బుడ్డీ కింద రెపరెపలాడుతున్న నీడ
కొసరి కొసరి గుర్తుకు తెస్తుంది
కీచురాళ్ళ సంగీతం
అడవి మండల కల్లకు బిగించిన బిర్రుకర్ర
వేపమానుల తియ్యటి చేదు వాసన…
ఈ దీపపు నీడలలోనే వడివడిగా దొర్లిపోయిన
పల్లెటూరి బాల్యంతో కలగాపులమైన
అనంతానుభూతుల పూల సుగంధాలు
మనోవీధికి విఃహారమవుతాయి
కిరోసిన్ బుడ్డీలోంచి సహజానందమేదో
నా లోలోపలికి ఇంకుతుంది నిండుగా...
ఎక్కడో ఎప్పుడో నేను పారేసుకున్న
రంగుపూల గోళీకాయ ఇప్పుడు దొకుతుంది
గుండెగుండెంతా అంజలిగా మారి
కిరోసిన్ బుడ్డీ ముందు మోకరిల్లుతుంది
ఇప్పుడా బుడ్డీని కూడా ఎవరో తన్నుకెళ్లి పోయారు
నాకునేను మిగలని గాఢాంధకారంలో...
అదిగో... అక్కడేదో మినుకు మంటోంది
ఇక్కడే ఉండండి... కాస్త చూసొస్తా...!
**************†******************************
👉 "మాధురి" వెబ్ మాసపత్రిక జూన్ 2025 సంచికలో ప్రచురితం.
Comments
Post a Comment